រដ្ឋាភិបាលអនុម័តគម្រោងវិនិយោគថ្មីជាមួយទុនវិនិយោគជិត១០០លានដុល្លារនៅខែមករា
ភ្នំពេញៈ ក្នុងខែមករា ឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគថ្មីចំនួន១០គម្រោង ដែលមានទឹកប្រា ក់សរុបប្រមាណជិត១០០លានដុល្លារអាមេរិក ខណៈកាលពីខែមុននេះ គម្រោងវិនិយោគថ្មីៗហាក់មានចំនួនច្រើន។
នេះបើតាមសេចក្ដីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាចេញផ្សាយជាបន្តបន្ទាប់កាលពីខែមករា ២០២៣។
យោងតាមសេចក្ដីប្រកាសព័ត៌មានដដែលបានបង្ហាញថា ក្នុងចំណោមគម្រោងទាំង១០ ដែលបានអនុម័តក្នុងខែ មករា គឺមានតែមួយគម្រោងប៉ុណ្ណោះ ដែលមានទឹកប្រាក់ច្រើន រហូតដល់ជាង៣៦លានដុល្លារអាមេរិក គឺគម្រោង បង្កើតរោងចក្រកាត់ដេរសម្លៀកបំពាក់របស់ ក្រុមហ៊ុន AROMA SUCCESS GARMENT CO., LTD ដែលមានទីតាំងវិនិយោគស្ថិតនៅភូមិតាំងស្នោ ឃុំទំព័រមាស ស្រុកសំរោងទង ខេត្តកំពង់ស្ពឺ ។
ក្រៅពីនេះ មានសុទ្ធតែជាគម្រោងមានទឹកប្រាក់ វិនិយោគក្រោម១០លានដុល្លារអាមេរិក និងជាគម្រោងវិនិយោគ លើរោងចក្រឧស្សាហកម្មកាត់ដេរ ដែលអាចបង្កើតការងារបានរាប់ម៉ឺនកន្លែង បន្ថែមទៀតដល់ប្រជាពលរដ្ឋកម្ពុជា។
កំណើននៃការវិនិយោគលើរោងចក្រ ឧស្សាហកម្មនេះដែរ ក៏បានជំរុញឱ្យតម្រូវការ នៃការប្រើប្រាស់ដីធ្លីនៅក្នុងប្រទេសកម្ពុជា កើនឡើងជាបន្តបន្ទាប់ងផងដែរ ជាក់ស្ដែងខេត្ត នៅប៉ែកខាងលិចរាជធានីភ្នំពេញ ដូចជាផ្នែកខ្លះនៃខេត្តកណ្ដាល និងខេត្តកំពង់ស្ពឺ មានការប្រើប្រាស់ដីធ្លីសម្រាប់សង់រោងចក្រច្រើន ។
យោងតាមការព្យាកររបស់ក្រសួងសេដ្ឋកិច្ច និងហិរញ្ញវត្ថុ នៃព្រះរាជាណាចក្រកម្ពុជាបានបង្ហាញថា វិស័យឧស្សាហកម្ម កម្មន្តសាល នៅតែបន្តកើនឡើងជាវិជ្ជមានក្នុងឆ្នាំ ២០២៣នេះ ដោយសារតែបណ្ដាប្រទេសបញ្ជាទិញធំៗ នៅលើពិភពលោកបានបង្វែរ ការបញ្ជាទិញរបស់ខ្លួនមកកាន់កម្ពុជា ស្របនឹងប្រទេសជាដៃគូប្រកួតប្រជែង ដូចជា មីយ៉ាន់ម៉ា កំពុងមានបញ្ហាផ្ទៃក្នុង។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកសន សៀបបានថ្លែងថា តម្រូវការប្រើប្រាស់ដីធ្លី ក្នុងប្រទេសកម្ពុជាក្នុងឆ្នាំ ២០២៣នេះ អាចនឹងមានកំណើនជាងឆ្នាំ២០២២ កន្លងទៅស្របនឹងស្ថាប័នអន្តរជាតិជាច្រើន ក៏បានព្យាករពីកំណើនសេដ្ឋកិច្ចរបស់កម្ពុជា នឹងកើនឡើងបន្តទៀត ជាវិជ្ជមាន ដូច្នេះវិស័យអចលនទ្រព្យ និងដីធ្លីក៏នឹងមានសន្ទុះបន្ថែមផងដែរ៕
Comments
Post a Comment